Share this:

Хүмүүс энэ сургалтын талаар мэддэг л байх тэгээд яагаад нэг ч хүн энэ сургалтыг дурьддаггүй нь их сонин санагдаад энэхүү мэдээллийг орууллаа.

Энэ сургалтын төв нь Австралийн засгийн газраас мэргэжлийн боловсон хүчин бэлтгэх зорилготойгоор Австралийн хот суурин бүрт өөрийн сургалтын төвтэйгээр үйл ажиллагаагаа явуулдаг бөгөөд практик дээр тулгуурласан сургалттай. /манай хуучны ТМС-тэй төстэй/.

Сургалтын агуулгын хувьд 1 өдрийн кофе бэлтгэх сургалтаас эхлээд бүтэн цагийн /full time/нарийн мэргэжлийн боловсрол олгодог. Суралцахад насны хязгаар байдаггүй бөгөөд зарим ерөнхий боловсролын сургуулийн сурагчид ахлах ангид орох жилээ /манайхаар 8-р ангиа төгсөх хэмжээний, 12 жилийн сургалттай бол 10 ангиа төгсөөд/ энэхүү сургалтын төвд шилжин суралцах нь бий.

Сургалтын чанарын хувьд маш өндөр, төлбөр нь хямд байдаг.

TAFE сургалтад:

- Шинээр мэргэжил эзэмших

- Ажиллаж байх хугацаандаа мэргэжил боловсролоо дээшлүүлэх

- Амралтыг болон богино хугацааны сургалт гэх мэт хүн бүрийн хэрэгцээнд таарах маш олон төрлийн сургалттай.

Сертификатын болон Дипломын зэрэг олгодог бөгөөд дипломын зэрэг авсан бол үргэлжлүүлэн Их дээд сургуулийн 3-р дамжаанаас суралцан баклаврын зэрэг авах бүрэн боломжтой. Сургалтын систем нь шат ахих байдлаар үнэлдэг.

- Certificate 1 /Суурь мэдлэгийн сургалтын төвшин/

- Certificate 2 /Ерөнхий мэдлэгийн болон ажилд орох үндсэн мэдлэгийн төвшин/

- Certificate 3 /Ахисан төвшин/

- Certificate 4 /Хагас мэргэжлийн болон техник, хувь хүний зохион байгуулалт, удирдлагын сургалт/

- Diploma /Мэргэжлийн сургалт/

- Advanced diploma /Нарийн мэргэжлийн сургалт/

- Certificate of education /18 буюу түүнээс дээш насныханд зориулсан ерөнхий боловсролын сургалт/

- Certificate of applied learning /ахлах сургуулийн 11,12-р ангийн сурагчдад зориулсан мэргэшил хавсарсан ерөнхий боловсролын сургалт/

Сургалтын төлбөрийн хувьд нэгж цагийн үнэлгээ нь 1.34AUD байх бөгөөд хамгийн багадаа $54.00, хамгийн ихдээ $858.00 байдаг /нэг жилийн хичээлийн агуулгаасаа хамаарна/. Мөн сургалтын төлбөрөөс гадна академик бус сургалтын үйл ажиллагаанд зориулан жилдээ $160 төлдөг. Энэхүү төлбөр нь боловсролыг дэмжих болон сургалтын үйл ажиллагаанд зарцуулагддаг.

Ингээд бодохоор хямд өртгөөр сурах арга бас байнаа. TAFE сургалтын төвүүдэд англи хэлний курс бас байдаг. Нарийн мэргэжлийн сургалтад хамрагдахад англи хэлний мэдлэг шаардагдах тул IELTS шалгалтын оноотой юмуу аль нэг сургалтын төвөөс сертификаттай байхыг шаардана.

TAFE сургалтын давуу тал нь хямд төлбөрөөр Австрали улс даяар хүлээн зөвшөөрөгдсөн чанартай боловсролыг эзэмшихээс гадна цаашид баклавр, магистр гээд сурах боломж юм /бүтэн 2 жилийн дээд сургуулийн төлбөрөөс ихийг хэмнэхээр байгаа биз/

Хамгийн сүүлд очиж уулзахад TAFE англи хэлний сургалтын сертификаттай бол Австралийн томоохон сургуулиудын нэг болох LaTrobe юниверситид IELTS шалгалтын оноогүйгээр элсэн ордог болох тухай ярьж байсан /энэ талаар яг албан ёсны мэдээлэл аваагүй шүү. LaTrobe их сургуулийн элсэлт хариуцсан албаны ажилтан хэлсэн юм/.

Одоо манай оронд уул уурхай хөгжих шатандаа явж байгаа үед TAFE  сургалтын дипломтой инженер, механик байхад гадаад орноос ирж ажиллаж буй нөхдөөс дутахгүй эрэлт хэрэцээтэй байгаа санагддаг /миний мэдэх хэд хэдэн мэргэжилтнүүд энэ сургуулийг төгссөн байсан шүү/. Ингээд ганцхан удаа сураад болох бус байнга сургалтад хамрагдаж өөрийгөө хөгжүүлдэг болчихвол манай Монгол орон сайхан хөгжнөө.

Австрали улсад ажиллаж амьдарч буй монголчууд маань ч гэсэн энэ сургуулийг амжилттай дүүргээд бусдын адил хөдөлмөрөө үнэлүүлж амьдарвал сайхан санагддаг. Хүмүүс ингээд хэрэгжүүлээд байгааг би мэдэхгүй байна уу?

Advertisement